Gitudloan sa mga dentista ang 106 ka kabataang Indigenous Peoples (IPs) sa hustong pamaagi sa pag-atiman sa ngipon atol sa selebrasyon sa National Dental Health Month, nga may temang"Pamilya, una kong dentista."

Gihimo ang kalihokan niadtong Pebrero 14 sa Dibabawon II Elementary School, Langilan District, Barangay Gupitan, diin gipasiugda ang importansya sa maayong oral hygiene. Ang mga kabataan nakadawat ogOral Health Family Packagesulod ang sabon, toothpaste, ug toothbrush alang sa ilang pamilya. Gihatagan usab sila og modyul sa dental care ug crayons alang sa ilang pag-eskwela.

Si Governor Edwin I. Jubahib, pinaagi sa Team Dental DavNor, mihatag og bugas sa mga IPs isip dugang suporta. Samtang, ang mga magtutudlo nagpahigayon og espesyal nga programa sa pagpasalamat, ug ang mga kabataan nagpakita sa ilang talento sa pagsayaw.

Gipasabot sa mga dentista nga ang sakit sa ngipon makabalda sa pagtuon sa mga bata, busa gikatakda nilang ipahigayon ang pag-ibot sa daut nga ngipon sa mosunod nga mga semana.

Ang aktibidad gipangulohan ni Dr. Ma. Cristina Jimena, Dentist IV sa Provincial Health Office, uban sa mga dentista nga sila si Dr. Erma Adora F. Balani, Dr. Dahlia E. Cañete, Dr. Emmylou Novo, Dr. Custodio Caezar B. Nambong, ug Earl Ryan Salang. Kuyog usab nila ang mga dentista gikan sa North Davao Dental Chapter, sa panguna sa ilang president nga si Dr. Cheryl Trinidad, ug ang mga representante sa Philippine Dental Association Inc., Kapalong, ug Carmen District Hospital.

Ang maong kalihokan, nga unang gihimo sa Talaingod sa miaging tuig, nagpadayon sa misyon sa pagpanghatag og dental services alang sa mga kabataan sa Davao del Norte.

Writer: Lorna Tripoli