Gitambongan sa kapin 600 ka presidente sa KAAGAPAY People’s Organization (PO) sa tibuok Davao del Norte ang unang pagsaulog sa KAAGAPAY Day (Kawsa sa Agrikultura ug Panginabuhian sa Barangay) nga gipahigayon niadtong Abril 21, 2025 sa DavNor Gym, Sports and Tourism Complex, Mankilam, Tagum City.
Ang selebrasyon gimugna aron ipakita ang padayong suporta sa probinsya alang sa sektor sa agrikultura ug panginabuhian, ilabina sa mga komunidad sa kabarangayan. Giatiman kini sa Provincial Government pinaagi sa pagtinabangay sa nagkadaiyang mga departamento sama sa Provincial Agriculturist’s Office, Provincial Environment and Natural Resources Office, Provincial Veterinarian’s Office, Provincial Governor’s Office, ug uban pa.
Gipasiugda sa kalihokan ang mga istorya sa kalampusan sa mga POs isip pagpanamin sa ilang kakugi, determinasyon, ug panaghiusa. Gawas pa niini, gihatagan sila og libreng mga binhi, bugas, ug semilya sa lubi, samtang ang uban nakadaug og mga gamit sa uma pinaagi sa pa-raffle.
Gipahimuslan usab sa mga benepisyaryo ang ilang partisipasyon pinaagi sa pag-apil sa mga training kabahin sa pag-atiman sa mga gulay, isda, ug free-range chicken, nga nagtumong sa pagpalig-on sa ilang kahibalo sa napiling panginabuhian.
Sa iyang mensahe, gihatagan og dakong gibug-aton ni Governor Edwin I. Jubahib ang plano sa pagpalapad sa KAAGAPAY Program pinaagi sa dugang pondo alang sa mga benepisyaryo. Matod niya nga ang tumong mao ang pagkab-ot sa mas taas nga lebel sa produksiyon, lakip ang paghimo og itlog, gulay, ug high-value crops nga ikabaligya dili lamang sa lokal kundi apil sa ubang probinsya ug sa dakbayan sa Davao.
"Unta moabot ta sa egg-layer nga level aron kita na’y mamahimong mass producer sa itlog, gulay, ug high-valued crops. Ug kung daghan na ta’g produkto, kita na usab ang maghimo og mga by-product pinaagi sa medium-scale nga mga pabrika. Grabe ang akong panglantaw para sa pag-asenso sa tanang miyembro sa KAAGAPAY," pahayag ni Jubahib.
Mapasalamaton sab si Cartelyn Sugatan, usa sa mga benepisyaryo sa programa, nga misulti nga dakong tabang ang KAAGAPAY sa ilang pamilya ilabina sa mga nagpuyo sa kabukiran.
“Nindot gyud kaayo ang programa ni Kuya Gov. Edwin Jubahib. Dili lang kini para sa mga taga-lungsod kundi apil sab kami nga gikan sa bukid,” matod ni Sugatan.
Si Dr. Dennis Sumaoy, ang acting department head sa Provincial Veterinarian’s Office, nipasabot nga ang KAAGAPAY Program namugna niadtong 2020 panahon sa pandemya, isip konkretong lakang aron matabangan ang katawhan sa ilang panginabuhian. Dugang ni Sumaoy, nga giila kini nga usa ka espesyal nga inisyatiba nga naghatag og tinuod nga suporta sa grassroots level.
Writer: Lorna Tripoli
