Miarangkada ang Risk Reduction Program - Climate Change Adaptation & Mitigation (RRP-CCAM) Pay-out sa nagkadaiyang lokalidad sa probinsya. Liboan ka mga benepisyaryo ang midawat og P4,380 kada usa alang sa napulo ka adlaw nga pagtrabaho sa komunidad.

1,456 benepisyaryo alang sa lungsod sa Braulio E. Dujali, New Corella ug Tagum City. Kini gipahinabo sa DavNor Coliseum, Barangay Mankilam, Tagum City, Agosto 16, 2023. Dungan niini ang pagdawat usab sa hinabang pinansyal sa 60 ka mga pamilya nga biktima sa kalamidad sa siyudad sa Tagum, diin ang puloy-anan sa usa kanila natumbahan og punoan sa kahoy.

Matud ni PSWDO Assistant Head Jeffrey Calamonggay, balor P10,000 ang tabang alang sa totally damaged, P5,000 sa partially damaged, ug P3,000 alang sa mga renters. Dako ilang pasalamat kay Governor Edwin "Kuya Gov"Jubahib sa iyang mainitong suporta human nga sila midawat sa maong ayuda.

"𝘒𝘶𝘺𝘢 𝘎𝘰𝘷, 𝘥𝘢𝘬𝘰 𝘬𝘢𝘢𝘺𝘰 𝘢𝘬𝘰𝘯𝘨 𝘱𝘢𝘴𝘢𝘭𝘢𝘮𝘢𝘵 𝘣𝘪𝘴𝘢𝘯 𝘵𝘶𝘰𝘥 𝘰𝘨 𝘬𝘢𝘯𝘵𝘪𝘥𝘢𝘥 𝘗5,000, 𝘥𝘢𝘬𝘰 𝘯𝘢 𝘬𝘢𝘢𝘺𝘰 ‘𝘯𝘪 𝘰𝘨 𝘵𝘢𝘣𝘢𝘯𝘨 𝘴𝘢 𝘢𝘮𝘰𝘢 𝘬𝘢𝘺 𝘱𝘢𝘳𝘢 𝘴𝘢 𝘢𝘮𝘰𝘢𝘯𝘨 𝘧𝘪𝘯𝘢𝘯𝘤𝘪𝘢𝘭 𝘢𝘴𝘴𝘪𝘴𝘵𝘢𝘯𝘤𝘦," sulti ni Mrs. Rosalie Mira, usa sa mga benepisyaryo.

Samtang 717 ka mga benepisyaryong residente sa siyudad sa Panabo ug 680 usab gikan sa lungsod sa Carmen ang midawat sa susamang benepisyo niadtong Agosto 22 sa nagpadayong Pay out sa RRP-CCAM.

Butyag ni DSWD Region XI Officer Rachel Guerrero nga mga punoan sa nagkadaiyang kahoy ang gitanom sa mga benepisyaryo sa ilang komunidad aron makatabang sa kinaiyahan.

"𝘔𝘰𝘴𝘵 𝘭𝘪𝘬𝘦𝘭𝘺 𝘪𝘭𝘢𝘯𝘨 𝘨𝘪𝘩𝘪𝘮𝘰 𝘬𝘢𝘳𝘰𝘯 𝘮𝘢𝘰 𝘢𝘯𝘨 𝘱𝘢𝘨𝘵𝘢𝘯𝘰𝘮 𝘰𝘨 𝘬𝘢𝘩𝘰𝘺 𝘯𝘨𝘢 𝘮𝘢𝘬𝘢𝘵𝘢𝘣𝘢𝘯𝘨 𝘬𝘪𝘯𝘪 𝘴𝘢 𝘤𝘰𝘮𝘮𝘶𝘯𝘪𝘵𝘺 𝘶𝘨 𝘴𝘢 𝘢𝘵𝘰𝘯𝘨 𝘱𝘢𝘭𝘪𝘣𝘰𝘵," ingon ni Guerrero.

Writer/Photos: Maria Lorna P. Tripoli