Gitambongan sa mga empleyado sa Provincial Capitol ang Employees Mental Health Forum nga gipahinabo sa DavNor Gym, Nobyembre 20, 2023. Sentro sa topikong gipaambit sa mga ekspertong mamumulong nga mga psychiatrist ang kamahinungdanon sa himsog nga panglawas ug panghunahuna. Ang mga nasampit mao sila si Dr. Rachele Jan Lobino-Enojada, Dr. Evangeline C. Castro, ug Ms. Myrna Florendo, usa ka retired nurse. Sila nagbatbat sa mga ugat hinungdan sa depresyon ug anxiety. Gipalawman pa ang diskusyon pinaagi sa paghatag og giya sa pakigbatok sa dili maayong kondisyon sa panghunahuna nga nakaapekto sa pagpanarbaho.
Kalisod, walay trabaho ug nahisugamak sa bayolenteng sitwasyon, ang sagad mga rason nga ang uban kanila nalisoan sa maayong pangisip ug buot na lamang kutloon ang ilang mga kinabuhi. Busa, ang labing gikinahanglan aron mahaw-as sa maong balatian mao ang pag-ila sa kaugalingon, lig-onon ang pagsalig sa espirituhanong aspeto, ug labaw sa tanan ang pagsabot ug suporta gikan sa pamilya.
Sa laing bahin, gikanayon ni Dr. Enojada nga usa usab sa rason sa mental problem kung kini nakuha mismo o inheritance sa ilang pamilya o kabanay.
"𝘔𝘢𝘯𝘺 𝘧𝘢𝘤𝘵𝘰𝘳𝘴 𝘤𝘰𝘯𝘵𝘳𝘪𝘣𝘶𝘵𝘦 𝘵𝘰 𝘮𝘦𝘯𝘵𝘢𝘭 𝘩𝘦𝘢𝘭𝘵𝘩 𝘤𝘰𝘯𝘥𝘪𝘵𝘪𝘰𝘯𝘴. 𝘔𝘢𝘰 𝘵𝘰𝘯𝘨 𝘪𝘯𝘨𝘰𝘯 𝘯𝘨𝘢 𝘥𝘪𝘭𝘪 𝘨𝘺𝘶𝘥 𝘯𝘪𝘮𝘰 𝘮𝘢-𝘢𝘯𝘰 𝘯𝘨𝘢 𝘬𝘢𝘯𝘢𝘯𝘨 𝘴𝘵𝘳𝘰𝘯𝘨 𝘭𝘢𝘯𝘨 𝘬𝘢. 𝘛𝘩𝘦𝘳𝘦 𝘪𝘴 𝘢 𝘣𝘪𝘰𝘭𝘰𝘨𝘪𝘤𝘢𝘭 𝘢𝘴𝘱𝘦𝘤𝘵 𝘰𝘳 𝘯𝘢𝘢 𝘨𝘺𝘶𝘥 𝘯𝘢𝘯𝘨 𝘨𝘪𝘵𝘢𝘸𝘢𝘨 𝘯𝘨𝘢 𝘪𝘯𝘩𝘦𝘳𝘪𝘵𝘢𝘯𝘤𝘦. 𝘐𝘵 𝘤𝘰𝘮𝘦𝘴 𝘧𝘳𝘰𝘮 𝘵𝘩𝘦 𝘧𝘢𝘮𝘪𝘭𝘺 𝘢𝘯𝘨 𝘢𝘯𝘹𝘪𝘦𝘵𝘺 𝘰𝘳 𝘥𝘦𝘱𝘳𝘦𝘴𝘴𝘪𝘰𝘯 𝘰𝘳 𝘰𝘵𝘩𝘦𝘳 𝘮𝘦𝘯𝘵𝘢𝘭 𝘤𝘰𝘯𝘥𝘪𝘵𝘪𝘰𝘯𝘴," ingon ni Dra. Enojada.
Katuyoan ni Governor Edwin "Kuya Gov" Jubahib sa maong forum nga kahatagan og himsog nga palibot sa pagpanarbaho ang mga empleyado, ug hinanaling tabang medikal sa mga nanginahanglan.
"𝘈𝘯𝘨 𝘮𝘢𝘢𝘺𝘰𝘯𝘨 𝘦𝘴𝘵𝘢𝘥𝘰 𝘴𝘢 𝘢𝘵𝘰𝘯𝘨 𝘱𝘢𝘯𝘨𝘩𝘶𝘯𝘢𝘩𝘶𝘯𝘢 𝘮𝘢𝘬𝘢𝘩𝘢𝘵𝘢𝘨 𝘰𝘨 𝘥𝘢𝘬𝘰𝘯𝘨 𝘦𝘱𝘦𝘬𝘵𝘰 𝘴𝘢 𝘢𝘵𝘰𝘢𝘯𝘨 𝘱𝘢𝘨𝘱𝘢𝘯𝘢𝘳𝘣𝘢𝘩𝘰 𝘶𝘨 𝘬𝘪𝘵𝘢 𝘮𝘢𝘬𝘢𝘢𝘯𝘨𝘬𝘰𝘯 𝘴𝘢 𝘴𝘢𝘬𝘵𝘰𝘯𝘨 𝘬𝘢𝘩𝘪𝘣𝘢𝘭𝘰 𝘬𝘶𝘯𝘨 𝘶𝘯𝘴𝘢𝘰𝘯 𝘢𝘯𝘨 𝘮𝘢𝘢𝘺𝘰 𝘯𝘨𝘢 𝘱𝘢𝘮𝘢𝘢𝘨𝘪 𝘴𝘢 𝘱𝘢𝘨-𝘮𝘢𝘯𝘢𝘨𝘦 𝘴𝘢 𝘢𝘵𝘰𝘯𝘨 𝘴𝘵𝘳𝘦𝘴𝘴 𝘶𝘨 𝘱𝘢𝘨𝘣𝘢𝘭𝘢𝘯𝘴𝘦 𝘴𝘢 𝘶𝘣𝘢𝘯𝘨 𝘢𝘴𝘱𝘦𝘵𝘰 𝘴𝘢 𝘢𝘵𝘰𝘯𝘨 𝘬𝘪𝘯𝘢𝘣𝘶𝘩𝘪. 𝘒𝘪𝘵𝘢 𝘮𝘢𝘮𝘢𝘩𝘪𝘮𝘰𝘯𝘨 𝘮𝘢𝘨𝘮𝘢𝘭𝘪𝘨-𝘰𝘯 𝘣𝘪𝘴𝘢𝘯 𝘱𝘢 𝘴𝘢 𝘩𝘢𝘨𝘪𝘵 𝘴𝘢 𝘱𝘢𝘯𝘢𝘩𝘰𝘯. 𝘉𝘪𝘭𝘪𝘭𝘩𝘰𝘯 𝘬𝘪𝘯𝘪 𝘢𝘳𝘰𝘯 𝘮𝘢𝘩𝘢𝘵𝘢𝘨 𝘯𝘢𝘵𝘰 𝘴𝘢 𝘬𝘢𝘵𝘢𝘸𝘩𝘢𝘯 𝘢𝘯𝘨 𝘴𝘦𝘳𝘣𝘪𝘴𝘺𝘰𝘯𝘨 𝘥𝘦𝘬𝘢𝘭𝘪𝘥𝘢𝘥," mensahe ni Kuya Gov nga gipaabot pinaagi ni Architect Lemuel Puerto.
Ang maong aktibidad gipangunahan sa Provincial Human Resource Management Office pinaagi sa ilang labaw nga si Edwin Palero duyog sa ubang mga department heads ug representante ni Governor Edwin "Kuya Gov" Jubahib. Kini kabahin sa Universal Health and Social Services sa KUYA GOB NG MASA Development Agenda alang sa pagpromotar sa Mental Health and Wellness Program aron makaangkon og produktibong work force ang probinsya.
Writer/Photos: Maria Lorna P. Tripoli
